Profesora Contratada Doutora no Departamento de Filoloxía Galega da USC, universidade onde se doutorou en 2009. Desenvolveu a súa traxectoria tamén noutros centros de europeos de excelencia, consolidando unha ampla experiencia internacional: Universidade de Coimbra, Université Rennes 2, CESCM de Poitiers, Centre for the Study of the Cantigas de Santa Maria da Oxford University.
Cultiva tres liñas de investigación preferentes: a literatura medieval galego-portuguesa, as conexións literarias e socioculturais entre axentes literarios e a edición crítica anotada de textos. Como ilustrativas da súa actividade investigadora, sobresaen dúas edicións críticas anotadas: O Cancioneiro de Fernan Fernandez Cogominho (2012) e El arte de trovar de amor. Nuno Eanes Cerzeo y su producción poética (2018). Ademais, ten liderado ou cooperado en iniciativas que resultaron na publicación de obras colectivas baixo o seu coidado: Trobadores, cancións e memoria. As redes da lírica galego-portuguesa (2026), Glossario prosopografico della lirica galego-portoghese medievale (2024, en coed. con Marcenaro), Verdades duplas (2022), Lírica galego-portuguesa. Lingua, sociolingüística e pragmática (2020), Humanidades digitales. Miradas hacia la Edad Media (2019, en coed. con Bermúdez Sabel).
Ten participado en frutíferos proxectos como membro do equipo de investigación e, en calidade de IP, ten levado a cabo sucesivos proxectos logrados en concorrencia competitiva, destacadamente: I2C B (2016), Retención de talento investigador (Xunta de Galicia 2020), Consolidación Investigadora (MICIU-AEI 2022). A estes dous últimos, lígase o recurso dixital Redes socioculturais da lírica galego-portuguesa. Desde 2021 dirixe Bibliografía de Referencia do Arquivo Galicia Medieval, que se desenvolve no CRPIH en convenio coa USC, impulsando unha terceira versión da base de datos bibliográfica BiRMED.